Бүгін Түркістан облыстық «Фараб» әмбебап ғылыми кітапханасымен «Елім деп туған ер еді» атты телекөпір өтті. Аталмыш шара Сарыарқаның қыраны Нұркен Әбдіровтың 105 жылдығына орай өткізілді. Шараға екі тараптан да кітапханашылармен қатар, зиялы қауым өкілдері және музей қызметкерлері қатысты. Телекөпір барысында батырдың өмірбаянына қатысты көптеген мәліметтер айтылды. Оның ішінде батырдың туысы, жерлесіміз, Қарқаралы спорттық-сауықтыру кешенінің директоры, аудандық мәслихат депутаты Нұрлан Байтуллин сөз сөйлеп, батырдың балалық шағына қатысты қызғылықты оқиғаларды тілге тиек етті. Әсіресе батырдың бала кезінен байқалған өжеттігі, ширақтығы, ерекше болмысы туралы әңгімелерді шара қатысушылары ұйып тыңдады. Сонымен қатар, Қарқаралы тарихи-өлкетану музейінің қызметкері Сәтбек Сламбеков батырдың жәдігерлерін таныстырды. Батырдың тоқылған портреті, Қарағанды қаласында тұрған ескерткішінің макеті мен анасының суретін көрсетіп, тарихынан сыр шертті.
